We wanilii jest cosik wyjōntkowygo. Mnie uspokajŏ i wprowadzŏ w dobry nastrōj. Ponoć wanilia kojarzy sie nōm z mlykiem matki a wrŏz z nim z ciepłem i bliskościōm.
Lody zaś może mało kojarzōm sie nam z ciepłem, pryndzyj ochłodōm w gorki letni dziyń, nale to właśnie lody sōm nŏjrŏdszym maszketem mojij mamy i beztōż je dzisiej rychtuja, skuli tego, co moja mama mŏ w nŏjbliższŏ strzoda geburstag.
Łōncza tōż wanilia i lody w jedno. Nŏjprostsze i nŏjsmakowitsze lody waniliowe. Bazuja na recypcie ȏd Davida Lebovitza z „The Perfect Scoop”, nŏjlypszej ksiōnżki z receptami lodowymi
Dejcie se pozōr! Kej rōz badniecie tyn recept, niy poradzicie już jeść inkszych lodōw! Fest uzŏlyżniajōm!
Co trzeja?
- 250 ml mlyka
- 150 gr cukru (dŏwōm mynij, kole 90 gr)
- 500 ml śmietōny 36%
- 1 lŏska wanilii
- 6 wiynkszych żōłtek
- ¾ łeżeczki ykstraktu ȏd wanilie
Nŏjprzōd zagrzyj mlyko, cuker, 250 ml śmietōny i sōl w tygliku.
Ciachnij wanilia podług, wyskrobej ziŏrynka i przidej je cuzamyn z lŏskōm do mlyka.
Zciōngnij z pieca i dej ȏstudzić bez 30 min do tympyratury pokojowyj.
Przelyj ȏstałŏ śmietōnka do gŏrka i dej na wiyrch cedzitko. W ȏsobnym (ja, to uż trzeci) gŏrczku wyfyrlej żōłtka a potym wlyj do nich mikstura z mlyka, śmietōny i wanilie. Fyrlej cołki czas, coby niy bōło z tego smażōnki!
Nasztaluj na strzedni ȏgiyń i trocha powarz, aże bydzie gynstnieć.
Kej uż tak bydzie, przelyj mikstura bez cedzitko. Przidej do niyj lŏska wanilie, ykstrakt i dej schłōdnōńć (we kōmpieli lodowyj a potym do kilszranku).
Wyciōng lŏska wanilie, wlyj mikstura do lodziarki, fyrlej, co bydōm dobre lody.
Brak komentarzy:
Prześlij komentarz